自介

我叫做蘇樂生，喺呢次製作入面擔任一位演員。

起初，同其他幾位演員一樣，陳焯威問我八月尾有無期，有無得諗。嗰時其實無得諗，因為我應該身在上海。不過，兄弟叫到，加埋佢話排得唔多，咁，我咪話ok囉。之後先開始同公司傾，度下可唔可以遲Ｄ先去。傾落，又ＯＫ喎，遲Ｄ先去可能仲好。於是，我就firm左了。

其實呢，唔係學生身份之後，我都係第一次參與排戲。好怕自己黎到排戲唔夠ＥＮＥＲＧＹ，好怕自己因為工作，唔可以順利去到排戲。但係，到最後，一切都係事在人為。搞戲如是，工作如是，搵老婆如是，減肥如是，生命中好多個ＴＡＳＫＳ，除左睇我點睇，就係睇我肯唔肯豁出去做架啫。

諗通左後，其實，事情無咩唔難吖。謀事在人，成事在天，我可以諗的做的都已經經歷左，餘下的就靠身邊的各位，同睇緊呢個ＢＬＯＧ的您了～喂其實六十蚊真係抵睇真係唔係貴家下睇場戲都要啦鑽石山又唔係吊腳喎地鐵直達不突止仲可以睇ＳＨＯＷ前後去埋荷里活廣場行下飯食下街實在係三五知己熱戀情人一家大細男女老幼姨媽姑姐叔伯兄弟週末消閒提昇個人素質的最佳選擇呀機會難逢華懋大廈八樓記住係八樓公演五場絕不加開有買趁手喇喂！